ದಕ್ಷಿಣ ಕೊರಿಯಾದ ಆಸಾನ್ನಲ್ಲಿ ನಡೆಯುತ್ತಿರುವ ಕೊರಿಯಾ ಮಾಸ್ಟರ್ಸ್ ಬ್ಯಾಡ್ಮಿಂಟನ್ ಟೂರ್ನಿಯಲ್ಲಿ ಭಾರತದ ಆಟಗಾರರು ಮಿಶ್ರ ಫಲಿತಾಂಶ ದಾಖಲಿಸಿದ್ದಾರೆ. ಮಹಿಳಾ ಸಿಂಗಲ್ಸ್ನಲ್ಲಿ ಭಾರತದ ಏಳು ಆಟಗಾರ್ತಿಯರು ಎರಡನೇ ಸುತ್ತಿಗೆ ಮುನ್ನಡೆದಿದ್ದರೆ, ಪುರುಷರ ಸಿಂಗಲ್ಸ್ನಲ್ಲಿ ಕಣಕ್ಕಿಳಿದಿದ್ದ ಎಲ್ಲಾ ಆರು ಭಾರತೀಯ ಆಟಗಾರರು ಮೊದಲ ಸುತ್ತಿನಲ್ಲೇ ಸೋತು ಹೊರಬಿದ್ದಿದ್ದಾರೆ.
ಮಹಿಳಾ ಸಿಂಗಲ್ಸ್ನಲ್ಲಿ ಅನ್ಮೋಲ್ ಖರ್ಬ್, ಮಾನ್ಸಿ ಸಿಂಗ್, ರಕ್ಷಿತಾ ರಾಮರಾಜ್, ಅಸ್ಮಿತಾ ಚಲಿಹಾ, ಇಶಾರಾಣಿ ಬರುವಾ, ತನ್ವಿ ಶರ್ಮಾ ಹಾಗೂ ಶ್ರೀಯಾಂಶಿ ವಲಿಶೆಟ್ಟಿ ಗೆಲುವು ಸಾಧಿಸಿ ಎರಡನೇ ಸುತ್ತಿಗೆ ಪ್ರವೇಶಿಸಿದ್ದಾರೆ.
ಅನ್ಮೋಲ್ ಖರ್ಬ್ ಅವರು ಹಾಂಕಾಂಗ್ನ ಲೋ ಸಿನ್ ಯಾನ್ ಅವರನ್ನು 16-21, 21-17, 21-12 ಅಂತರದಿಂದ ಮಣಿಸಿದರು. ಮಾನ್ಸಿ ಸಿಂಗ್ ಅವರು ಕೊರಿಯಾದ ಕಿಮ್ ಜೂ ಯುನ್ ವಿರುದ್ಧ ಮೊದಲ ಗೇಮ್ನಲ್ಲಿ ಸೋತರೂ, ಬಳಿಕ ತಿರುಗೇಟು ನೀಡಿ 14-21, 21-19, 21-9 ಅಂತರದಲ್ಲಿ ಗೆಲುವು ದಾಖಲಿಸಿದರು.
ರಕ್ಷಿತಾ ರಾಮರಾಜ್ ಅವರು ಕೊರಿಯಾದ ಎ ಯೆಯಾನ್ ಯೂ ಅವರನ್ನು 22-24, 21-12, 21-13 ಅಂತರದಲ್ಲಿ ಸೋಲಿಸಿದರು. ಅಸ್ಮಿತಾ ಚಲಿಹಾ ಅವರು ಜಪಾನ್ನ ರಿರಿನಾ ಹಿರಾಮೊಟೊ ವಿರುದ್ಧ 22-20, 21-18 ಅಂತರದಲ್ಲಿ ಜಯ ಸಾಧಿಸಿದರು.
ಇಶಾರಾಣಿ ಬರುವಾ ಅವರು ಕೊರಿಯಾದ ಲೀ ಸೋ ಹೀ ಅವರನ್ನು 18-21, 21-15, 21-7 ಅಂತರದಲ್ಲಿ ಮಣಿಸಿದರು. ತನ್ವಿ ಶರ್ಮಾ ಅವರು ಚೀನಾದ ಆನ್ ಕಿ ಯುವಾನ್ ಅವರನ್ನು 21-16, 21-15 ಅಂತರದಲ್ಲಿ ಸೋಲಿಸಿ ಮುಂದಿನ ಸುತ್ತಿಗೆ ಅರ್ಹತೆ ಪಡೆದರು.
ಶ್ರೀಯಾಂಶಿ ವಲಿಶೆಟ್ಟಿ ಅವರು ಚೈನೀಸ್ ತೈಪೆಯ ಯು ಪೋ ಪೈ ಅವರನ್ನು 21-15, 21-14 ಅಂತರದಲ್ಲಿ ಮಣಿಸಿ ಎರಡನೇ ಸುತ್ತಿಗೆ ಪ್ರವೇಶಿಸಿದರು. ಆದರೆ ಭಾರತದ ಆಕರ್ಷಿ ಕಶ್ಯಪ್ ಅವರು ಕೊರಿಯಾದ ಮಿನ್ ಜಿ ಕಿಮ್ ವಿರುದ್ಧ ಸೋಲು ಕಂಡು ಟೂರ್ನಿಯಿಂದ ಹೊರಬಿದ್ದರು.
ಮಹಿಳಾ ಡಬಲ್ಸ್ನಲ್ಲೂ ಭಾರತಕ್ಕೆ ಶುಭಾರಂಭವಾಗಿದ್ದು, ಸೋನಾಲಿ ಸಿಂಗ್ ಮತ್ತು ರಿತಿಕಾ ಠಾಕರ್ ಜೋಡಿ ಕೊರಿಯಾದ ಜಿ ಸನ್ ಬ್ಯಾಂಗ್ ಮತ್ತು ಹ್ಯುನ್ ಜಿ ಜಾಂಗ್ ಜೋಡಿಯನ್ನು ಮಣಿಸಿ ಎರಡನೇ ಸುತ್ತಿಗೆ ಪ್ರವೇಶಿಸಿದೆ.
ಮಿಶ್ರ ಡಬಲ್ಸ್ನಲ್ಲಿ ಆರನೇ ಶ್ರೇಯಾಂಕದ ಶ್ರುತಿ ಮಿಶ್ರಾ ಮತ್ತು ಇಶಾನ್ ಭಟ್ನಾಗರ್ ಜೋಡಿ ತಮ್ಮದೇ ದೇಶದ ಸಾತ್ವಿಕ್ ರೆಡ್ಡಿ ಕನಪುರಂ ಮತ್ತು ರಾಧಿಕಾ ಶರ್ಮಾ ಜೋಡಿಯನ್ನು ಸೋಲಿಸಿ ಮುಂದಿನ ಸುತ್ತಿಗೆ ಅರ್ಹತೆ ಪಡೆದಿದೆ.
ಪುರುಷರ ಸಿಂಗಲ್ಸ್ನಲ್ಲಿ ಭಾರತದ ಮಾಜಿ ವಿಶ್ವ ನಂ.1 ಕಿದಂಬಿ ಶ್ರೀಕಾಂತ್, ಮಿಥುನ್ ಮಂಜುನಾಥ್, ಕಿರಣ್ ಜಾರ್ಜ್, ರೌನಕ್ ಚೌಹಾಣ್, ಸನೀತ್ ದಯಾನಂದ್ ಹಾಗೂ ತರುಣ್ ಮನ್ನೆಪಲ್ಲಿ ಮೊದಲ ಸುತ್ತಿನಲ್ಲೇ ಸೋಲು ಅನುಭವಿಸಿ ಹೊರಬಿದ್ದಿದ್ದಾರೆ.
ಇದೇ ವೇಳೆ ಪುರುಷರ ಡಬಲ್ಸ್ನಲ್ಲಿ ಶ್ರೇಯಾಂಕ ರಹಿತ ಭಾರತದ ಕೃಷ್ಣ ಪ್ರಸಾದ್ ಗರಗ ಮತ್ತು ಪೃಥ್ವಿ ಕೃಷ್ಣಮೂರ್ತಿ ರಾಯ್ ಜೋಡಿ ಭರ್ಜರಿ ಅಚ್ಚರಿ ಗೆಲುವು ದಾಖಲಿಸಿದೆ. ಆರನೇ ಶ್ರೇಯಾಂಕದ ಥಾಯ್ಲೆಂಡ್ನ ಚಲೋಯೆಂಪೊನ್ ಚರೋಯೆನ್ಕಿತಾಮೊರ್ನ್ ಮತ್ತು ವೊರ್ರಾಪೊಲ್ ಥಾಂಗ್ಸಾ-ಂಗಾ ಜೋಡಿಯನ್ನು 21-16, 21-18 ಅಂತರದಲ್ಲಿ ಮಣಿಸಿ ಎರಡನೇ ಸುತ್ತಿಗೆ ಪ್ರವೇಶಿಸಿದೆ.
ಮುಂದಿನ ಸುತ್ತಿನಲ್ಲಿ ಭಾರತೀಯ ಜೋಡಿ ಕೊರಿಯಾದ ವೈ ಕಿಮ್ ಮತ್ತು ಟಿ ಶಿನ್ ಜೋಡಿಯನ್ನು ಪ್ರಿ-ಕ್ವಾರ್ಟರ್ಫೈನಲ್ನಲ್ಲಿ ಎದುರಿಸಲಿದೆ.
