ಟೋಕಿಯೊ: ಜಪಾನ್ ಓಪನ್ ಟೆನಿಸ್ ಟೂರ್ನಿಯ ಪುರುಷರ ಸಿಂಗಲ್ಸ್ ಫೈನಲ್‌ನಲ್ಲಿ ವಿಶ್ವದ 3ನೇ ಶ್ರೇಯಾಂಕದ ಕಾರ್ಲೊಸ್ ಅಲ್ಕರಾಝ್ ಮತ್ತು 19ನೇ ಶ್ರೇಯಾಂಕದ ಜಿರಿ ಲೆಹೆಚ್ಚಾ ಇಂದು ಮುಖಾಮುಖಿಯಾಗಲಿದ್ದಾರೆ. ಟೋಕಿಯೊದ ಅರಿಯಾಕೆ ಕೊಲೊಸಿಯಂನಲ್ಲಿ ನಡೆಯಲಿರುವ ಈ ಫೈನಲ್‌ನಲ್ಲಿ ಹಾಲಿ ಚಾಂಪಿಯನ್ ಅಲ್ಕರಾಝ್ ಪ್ರಶಸ್ತಿಯನ್ನು ಉಳಿಸಿಕೊಳ್ಳುವ ಗುರಿಯೊಂದಿಗೆ ಕಣಕ್ಕಿಳಿಯಲಿದ್ದಾರೆ.
ಸೆಮಿಫೈನಲ್‌ನಲ್ಲಿ ಅಲ್ಕರಾಝ್ ತಮ್ಮ ದೇಶದ ಆಟಗಾರ ಜೌಮೆ ಮುನಾರ್ ವಿರುದ್ಧ ಮೊದಲ ಸೆಟ್‌ನಲ್ಲಿ 5-7ರಿಂದ ಹಿನ್ನಡೆ ಅನುಭವಿಸಿದರೂ, ಬಳಿಕ ತಿರುಗೇಟು ನೀಡಿದರು. ಮುಂದಿನ ಎರಡು ಸೆಟ್‌ಗಳನ್ನು 6-3, 6-1ರಿಂದ ಗೆದ್ದು ಪಂದ್ಯವನ್ನು ತಮ್ಮದಾಗಿಸಿಕೊಂಡು ಫೈನಲ್ ಪ್ರವೇಶಿಸಿದರು.
ಮತ್ತೊಂದೆಡೆ, ಜೆಕ್ ಗಣರಾಜ್ಯದ ಜಿರಿ ಲೆಹೆಚ್ಚಾ ಸೆಮಿಫೈನಲ್‌ನಲ್ಲಿ ಮೊನಾಕೊದ ವಾಲೆಂಟಿನ್ ವಾಚೆರೋ ಅವರನ್ನು 6-4, 6-2 ನೇರ ಸೆಟ್‌ಗಳಿಂದ ಮಣಿಸಿ ಫೈನಲ್‌ಗೆ ಅರ್ಹತೆ ಪಡೆದರು.
ಡಬಲ್ಸ್‌ನಲ್ಲೂ ಪ್ರಶಸ್ತಿ ಸಮರ
ಪುರುಷರ ಡಬಲ್ಸ್ ವಿಭಾಗದ ಫೈನಲ್‌ನಲ್ಲೂ ಇಂದು ಕುತೂಹಲಕಾರಿ ಕಾದಾಟ ನಡೆಯಲಿದೆ. ಅಮೆರಿಕದ ಆಸ್ಟಿನ್ ಕ್ರಾಜಿಸೆಕ್ ಮತ್ತು ಕ್ರೊಯೇಷಿಯಾದ ನಿಕೋಲಾ ಮೆಕ್ಟಿಚ್ ಜೋಡಿ ಫ್ರಾನ್ಸ್‌ನ ಥಿಯೋ ಅರಿಬಾಜೆ ಮತ್ತು ಅಲ್ಬಾನೊ ಒಲಿವೆಟ್ಟಿ ಜೋಡಿಯನ್ನು ಎದುರಿಸಲಿದೆ.
ಹೀಗಾಗಿ ಜಪಾನ್ ಓಪನ್‌ನ ಅಂತಿಮ ದಿನ ಸಿಂಗಲ್ಸ್ ಹಾಗೂ ಡಬಲ್ಸ್ ಎರಡೂ ವಿಭಾಗಗಳಲ್ಲಿ ಟೆನಿಸ್ ಅಭಿಮಾನಿಗಳಿಗೆ ರೋಚಕ ಪಂದ್ಯಗಳ ನಿರೀಕ್ಷೆ ಮೂಡಿಸಿದೆ.
