ಅಂಕಾರಾ: ಕುರ್ದಿಸ್ತಾನ್ ವರ್ಕರ್ಸ್ ಪಾರ್ಟಿ (PKK) ಜೊತೆಗಿನ ಶಾಂತಿ ಪ್ರಕ್ರಿಯೆಯನ್ನು ಮುಂದುವರಿಸುವ ಟರ್ಕಿ ಸರ್ಕಾರದ ಪ್ರಯತ್ನಗಳಿಗೆ ಮತ್ತಷ್ಟು ಬಲ ದೊರೆತಿದೆ. ಸಾವಿರಾರು ಕುರ್ದ್ ಉಗ್ರರಿಗೆ ಷರತ್ತುಬದ್ಧ ಕ್ಷಮಾದಾನ ನೀಡುವ ಕಾನೂನು ಮಸೂದೆಗೆ ಟರ್ಕಿ ಸಂಸತ್ತು ಭಾರಿ ಬಹುಮತದೊಂದಿಗೆ ಅನುಮೋದನೆ ನೀಡಿದೆ.
ಆದರೆ ಈ ಕ್ಷಮಾದಾನ ತಕ್ಷಣದಿಂದಲೇ ಜಾರಿಗೆ ಬರುವುದಿಲ್ಲ. PKK ಸಂಪೂರ್ಣವಾಗಿ ಶಸ್ತ್ರಾಸ್ತ್ರ ತ್ಯಜಿಸಿದೆ ಎಂಬುದನ್ನು ಟರ್ಕಿ ಅಧಿಕಾರಿಗಳು ಖಚಿತಪಡಿಸಿದ ಬಳಿಕವಷ್ಟೇ ಕಾನೂನು ಜಾರಿಗೆ ಬರಲಿದೆ ಎಂದು ತಿಳಿಸಲಾಗಿದೆ.
ಟರ್ಕಿ ಸರ್ಕಾರ ಮತ್ತು PKK ನಡುವಿನ ದಶಕಗಳ ಸಂಘರ್ಷಕ್ಕೆ ಅಂತ್ಯ ಹಾಡುವ ಪ್ರಯತ್ನದ ಭಾಗವಾಗಿ ಈ ಕ್ರಮ ಕೈಗೊಳ್ಳಲಾಗಿದೆ. ಕಳೆದ ವರ್ಷ PKK, ಟರ್ಕಿ ಸರ್ಕಾರದ ವಿರುದ್ಧ ಹಲವು ದಶಕಗಳಿಂದ ನಡೆಸಿಕೊಂಡು ಬಂದಿದ್ದ ಸಶಸ್ತ್ರ ಹೋರಾಟವನ್ನು ಅಂತ್ಯಗೊಳಿಸುವುದಾಗಿ ಘೋಷಿಸಿತ್ತು. ಶಾಂತಿ ಪ್ರಕ್ರಿಯೆಯ ಭಾಗವಾಗಿ ಸಂಘಟನೆಯನ್ನು ವಿಸರ್ಜಿಸುವುದಾಗಿಯೂ ತಿಳಿಸಿತ್ತು. ಜೈಲಿನಲ್ಲಿರುವ PKK ನಾಯಕ ಅಬ್ದುಲ್ಲಾ ಓಜಲಾನ್ ಅವರ ಕರೆಯ ನಂತರ ಈ ನಿರ್ಧಾರ ಕೈಗೊಳ್ಳಲಾಗಿತ್ತು.
ದಶಕಗಳ ಸಂಘರ್ಷಕ್ಕೆ ಅಂತ್ಯದ ನಿರೀಕ್ಷೆ
PKK ಮತ್ತು ಟರ್ಕಿ ಸರ್ಕಾರದ ನಡುವಿನ ಸಂಘರ್ಷದಲ್ಲಿ ಹತ್ತಾರು ಸಾವಿರ ಮಂದಿ ಪ್ರಾಣ ಕಳೆದುಕೊಂಡಿದ್ದಾರೆ. ಹೀಗಾಗಿ ಸಂಸತ್ತಿನ ಇತ್ತೀಚಿನ ನಿರ್ಧಾರವು ದೀರ್ಘಕಾಲದ ಸಂಘರ್ಷವನ್ನು ಅಂತ್ಯಗೊಳಿಸುವ ನಿಟ್ಟಿನಲ್ಲಿ ಮಹತ್ವದ ಹೆಜ್ಜೆ ಎಂದು ಪರಿಗಣಿಸಲಾಗಿದೆ.
ಈ ಕಾನೂನು ಕ್ರಮವು ಟರ್ಕಿಯ ಗಡಿಯಾಚೆಯೂ ಪರಿಣಾಮ ಬೀರುವ ಸಾಧ್ಯತೆಯಿದೆ. ವಿಶೇಷವಾಗಿ ಟರ್ಕಿ ಮತ್ತು ಇರಾಕ್ ನಡುವಿನ ಸಂಬಂಧಗಳನ್ನು ಮತ್ತಷ್ಟು ಬಲಪಡಿಸಲು ಇದು ಸಹಕಾರಿಯಾಗಬಹುದು ಎಂದು ನಿರೀಕ್ಷಿಸಲಾಗಿದೆ.
ಇದರ ಜೊತೆಗೆ, ಸಿರಿಯಾದಲ್ಲಿ ಈ ಹಿಂದೆ ಕುರ್ದ್ ನೇತೃತ್ವದ ಸಿರಿಯನ್ ಡೆಮಾಕ್ರಟಿಕ್ ಫೋರ್ಸಸ್ (SDF) ನಿಯಂತ್ರಣದಲ್ಲಿದ್ದ ಪ್ರದೇಶಗಳನ್ನು ಸಿರಿಯನ್ ಸರ್ಕಾರದ ಆಡಳಿತ ವ್ಯವಸ್ಥೆಯೊಂದಿಗೆ ಸಂಯೋಜಿಸುವ ಪ್ರಯತ್ನಗಳಿಗೂ ಈ ಬೆಳವಣಿಗೆ ನೆರವಾಗಬಹುದು.
SDF ಸಂಘಟನೆಯು PKK ಜೊತೆ ಸಂಪರ್ಕ ಹೊಂದಿದೆ ಎಂಬುದು ಟರ್ಕಿಯ ನಿಲುವಾಗಿದೆ. ಹೀಗಾಗಿ ಟರ್ಕಿಯ ಸಂಸತ್ತಿನ ಈ ನಿರ್ಧಾರವು ದೇಶೀಯ ಶಾಂತಿ ಪ್ರಕ್ರಿಯೆಯ ಜೊತೆಗೆ ಪ್ರಾದೇಶಿಕ ರಾಜಕೀಯ ಮತ್ತು ಭದ್ರತಾ ಪರಿಸ್ಥಿತಿಯ ಮೇಲೂ ಪರಿಣಾಮ ಬೀರುವ ಸಾಧ್ಯತೆ ಇದೆ.
