ದೆಹಲಿ: ಇಂಡಿಗೋ ವಿಮಾನಗಳ ವೇಳಾಪಟ್ಟಿ ವ್ಯತ್ಯಯ ಪ್ರಕರಣಕ್ಕೆ ತಾತ್ಕಾಲಿಕ ಪರಿಹಾರವಾಗಿ, ನಾಗರಿಕ ವಿಮಾನಯಾನ ಮಹಾನಿರ್ದೇಶನಾಲಯ (DGCA) ಪ್ರಕಟಿಸಿದ್ದ ಫ್ಲೈಟ್ ಡ್ಯೂಟಿ ಟೈಮ್ ಲಿಮಿಟೇಷನ್(FDTL) ಆದೇಶವನ್ನು ತಕ್ಷಣದಿಂದಲೇ ಅಮಲಿಲ್ಲದಂತೆ ಇರಿಸಲಾಗಿದೆ ಎಂದು ನಾಗರಿಕ ವಿಮಾನಯಾನ ಸಚಿವ ರಾಮ ಮೋಹನ್ ನಾಯ್ಡು ಘೋಷಿಸಿದ್ದಾರೆ.
ಇತ್ತೀಚೆಗೆ ವಿಮಾನಗಳ ವಿಳಂಬ, ರದ್ದತಿ ಕಾರಣದಿಂದ ಪ್ರಯಾಣಿಕರು ಎದುರಿಸುತ್ತಿರುವ ತೊಂದರೆಗೆ ತ್ವರಿತ ಸ್ಪಂದನೆ ನೀಡುವಂತೆ ಕೇಂದ್ರ ಸರ್ಕಾರ ಕ್ರಮ ಕೈಗೊಂಡಿದೆ. ವಿಶೇಷವಾಗಿ ಹಿರಿಯ ನಾಗರಿಕರು, ವಿದ್ಯಾರ್ಥಿಗಳು, ರೋಗಿಗಳು ಹಾಗೂ ತುರ್ತು ಪ್ರಯಾಣ ಅಗತ್ಯವಿರುವವರಿಗೆ ಉಂಟಾಗುವ ತೊಂದರೆಯನ್ನು ಗಮನದಲ್ಲಿರಿಸಿಕೊಂಡು ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಸಚಿವರು ತಿಳಿಸಿದರು.
ಸಾಮಾನ್ಯ ವಿಮಾನ ಸೇವೆಗಳನ್ನು ಶೀಘ್ರ ಪುನರ್ಸ್ಥಾಪಿಸಲು ಹಲವು ಕಾರ್ಯಾಚರಣಾ ಸೂಚನೆಗಳನ್ನು ಏರ್ಲೈನ್ಗಳಿಗೆ ನೀಡಲಾಗಿದೆ. ನಾಳೆಯೊಳಗೆ ಹೆಚ್ಚಿನ ವಿಮಾನಗಳ ವೇಳಾಪಟ್ಟಿ ಸಾಮಾನ್ಯ ಸ್ಥಿತಿಗೆ ಮರಳುವ ನಿರೀಕ್ಷೆಯಿದ್ದು, ಮುಂದಿನ ಮೂವರು ದಿನಗಳಲ್ಲಿ ಸಂಪೂರ್ಣವಾಗಿ ಸೇವೆಗಳು ಪುನಃ ಸಾಮಾನ್ಯಗೊಳ್ಳಲಿವೆ ಎಂದು ಸಚಿವಾಲಯ ವಿಶ್ವಾಸ ವ್ಯಕ್ತಪಡಿಸಿದೆ.
ಪ್ರಯಾಣಿಕರಿಗೆ ನಿಖರ ಮಾಹಿತಿ ದೊರಕುವಂತೆ ಏರ್ಲೈನ್ಗಳಿಗೆ ಆನ್ಲೈನ್ ಅಪ್ಡೇಟ್ ವ್ಯವಸ್ಥೆ ಬಲಪಡಿಸುವಂತೆ ನಿರ್ದೇಶನ ನೀಡಲಾಗಿದೆ. ವಿಮಾನ ರದ್ದಾದಲ್ಲಿ ಯಾವುದೇ ಅರ್ಜಿ ಬೇಡದೆ ಪೂರ್ಣ ಹಣ ಹಿಂತಿರುಗಿಸುವ ಆದೇಶ ನೀಡಲಾಗಿದೆ. ಹಿರಿಯರು ಹಾಗೂ ದಿವ್ಯಾಂಗ ಪ್ರಯಾಣಿಕರಿಗೆ ವಿಶೇಷ ಸಹಾಯ, ಲೌಂಜ್ ಸೌಲಭ್ಯ ಕಲ್ಪಿಸಲು ಸೂಚಿಸಲಾಗಿದೆ.
ಪರಿಸ್ಥಿತಿ ನಿರಂತರವಾಗಿ ಮಾನಿಟರ್ ಮಾಡಲು 24×7 ನಿಯಂತ್ರಣ ಕೊಠಡಿ ಸ್ಥಾಪಿಸಲಾಗಿದ್ದು, ತಕ್ಷಣ ಕ್ರಮ ಕೈಗೊಳ್ಳಲಾಗುತ್ತಿದೆ ಎಂದು ಸಚಿವಾಲಯ ತಿಳಿಸಿದೆ.
ಸರ್ಕಾರ ಯಾವುದೇ ತೊಂದರೆಯನ್ನು ಲಘೂಕರಿಸಿ, ವಿಮಾನ ಸಾರಿಗೆ ವ್ಯವಸ್ಥೆ ಶೀಘ್ರ ಸಾಮಾನ್ಯವಾಗುವಂತೆ ಅಗತ್ಯವಿರುವ ನಿಯಂತ್ರಣ ಸಡಿಲಿಕೆಗಳನ್ನೂ ಕೂಡ ಒದಗಿಸುತ್ತಿದೆ ಎಂದು ವಿಮಾನಯಾನ ಸಚಿವರು ಸ್ಪಷ್ಟಪಡಿಸಿದ್ದಾರೆ.
