ವಡನಗರದಿಂದ ವಾರಾಣಸಿಗೆ ‘ಸೇವಾ ಯಾತ್ರೆ’: ಇಂದು ಯಾತ್ರಿಗಳೊಂದಿಗೆ ಪ್ರಧಾನಿ ಮೋದಿ ಸಂವಾದ

ನವದೆಹಲಿ: ‘ಸೇವಾ ಸಂಕಲ್ಪ ಅಭಿಯಾನ’ದ ಅಂಗವಾಗಿ ವಡನಗರದಿಂದ ವಾರಾಣಸಿಗೆ ಪ್ರಯಾಣಿಸುತ್ತಿರುವ ಸೇವಾ ಯಾತ್ರಿಕರೊಂದಿಗೆ ಪ್ರಧಾನಿ ನರೇಂದ್ರ ಮೋದಿ ಇಂದು ವಿಡಿಯೊ ಕಾನ್ಫರೆನ್ಸ್ ಮೂಲಕ ಸಂವಾದ ನಡೆಸಲಿದ್ದಾರೆ. ಯಾತ್ರೆಯ ವೇಳೆ ತಾವು ಕಂಡ ಅನುಭವಗಳು, ಜನರೊಂದಿಗೆ ನಡೆಸಿದ ಸಂವಾದ ಹಾಗೂ ಕೈಗೊಂಡ ಸೇವಾ ಚಟುವಟಿಕೆಗಳನ್ನು ಯಾತ್ರಿಕರು ಪ್ರಧಾನಮಂತ್ರಿಯವರೊಂದಿಗೆ ಹಂಚಿಕೊಳ್ಳಲಿದ್ದಾರೆ.

ಪ್ರಧಾನಿ ಮೋದಿಯವರ ಸಾರ್ವಜನಿಕ ಜೀವನದ 25 ವರ್ಷಗಳನ್ನು ಗುರುತಿಸುವ ಉದ್ದೇಶದಿಂದ ಆರಂಭಿಸಿರುವ ‘ಸೇವಾ ಸಂಕಲ್ಪ ಅಭಿಯಾನ’ದ ಭಾಗವಾಗಿ ಸೆಪ್ಟೆಂಬರ್ 17ರಂದು ಸೇವಾ ಯಾತ್ರೆ ಆರಂಭಗೊಂಡಿದೆ. ವಡನಗರದಿಂದ ವಾರಾಣಸಿವರೆಗೆ ಸಾಗುವ ಈ ಯಾತ್ರೆಯಲ್ಲಿ ಯುವಕರು ವಿವಿಧ ರಾಜ್ಯಗಳು, ಜಿಲ್ಲೆಗಳು, ತಾಲೂಕುಗಳು ಹಾಗೂ ಗ್ರಾಮಗಳ ಮೂಲಕ ಸಂಚರಿಸುತ್ತಿದ್ದಾರೆ.

ಸೇವೆಯ ಜತೆಗೆ ಜನಸಂಪರ್ಕ

ಇದು ಕೇವಲ ಬೈಕ್‌ ಯಾತ್ರೆಗೆ ಸೀಮಿತವಾಗಿಲ್ಲ. ಸಮುದಾಯ ಸೇವೆ, ಯುವಕರ ಪಾಲ್ಗೊಳ್ಳುವಿಕೆ, ಜನಸಂಪರ್ಕ, ಸಾಮಾಜಿಕ ಕಲ್ಯಾಣ ಮತ್ತು ಸಮುದಾಯದ ಸಕ್ರಿಯ ಭಾಗವಹಿಸುವಿಕೆ ಸೇರಿದಂತೆ ವಿವಿಧ ಚಟುವಟಿಕೆಗಳಿಗೆ ಯಾತ್ರೆಯಲ್ಲಿ ಒತ್ತು ನೀಡಲಾಗಿದೆ.

ವಡನಗರ–ವಾರಾಣಸಿ ಮಾರ್ಗದಲ್ಲಿ ಒಟ್ಟು 10 ತಂಡಗಳು ಯಾತ್ರೆ ಕೈಗೊಂಡಿವೆ. ವಿವಿಧ ಪ್ರದೇಶಗಳಲ್ಲಿ ಸ್ಥಳೀಯ ಜನರೊಂದಿಗೆ ಸಂವಾದ ನಡೆಸುವುದರ ಜತೆಗೆ ಸೇವಾ ಕಾರ್ಯಗಳಲ್ಲೂ ಯಾತ್ರಿಕರು ಭಾಗವಹಿಸುತ್ತಿದ್ದಾರೆ.

ಸ್ವಚ್ಛತಾ ಅಭಿಯಾನ, ಶಾಲೆ–ಆಸ್ಪತ್ರೆಗಳಿಗೆ ಭೇಟಿ

ಯಾತ್ರೆಯ ಸಂದರ್ಭದಲ್ಲಿ ಹಲವು ಕಡೆ ಸ್ವಚ್ಛತಾ ಅಭಿಯಾನಗಳು, ಸ್ಥಳೀಯ ನಿವಾಸಿಗಳು ಹಾಗೂ ಫಲಾನುಭವಿಗಳೊಂದಿಗೆ ಸಂವಾದ, ಶಾಲೆಗಳು, ಆಸ್ಪತ್ರೆಗಳು, ನರ್ಸಿಂಗ್ ಹೋಮ್‌ಗಳು ಸೇರಿದಂತೆ ವಿವಿಧ ಸಮುದಾಯ ಕೇಂದ್ರಗಳಲ್ಲಿ ಸೇವಾ ಚಟುವಟಿಕೆಗಳನ್ನು ಹಮ್ಮಿಕೊಳ್ಳಲಾಗಿದೆ.

ಜನಸೇವೆಯ ಸಂದೇಶವನ್ನು ಗ್ರಾಮೀಣ ಮತ್ತು ಸ್ಥಳೀಯ ಮಟ್ಟಕ್ಕೆ ಕೊಂಡೊಯ್ಯುವುದು ಹಾಗೂ ಯುವಕರನ್ನು ಸಾಮಾಜಿಕ ಸೇವೆಯೊಂದಿಗೆ ಬೆಸೆಯುವುದು ಯಾತ್ರೆಯ ಪ್ರಮುಖ ಉದ್ದೇಶಗಳಲ್ಲಿ ಒಂದಾಗಿದೆ.

ಅಕ್ಟೋಬರ್ 7ರವರೆಗೆ ಯಾತ್ರೆ

ಸೆಪ್ಟೆಂಬರ್ 17ರಂದು ಗುಜರಾತ್‌ನ ವಡನಗರದಲ್ಲಿ ಕೇಂದ್ರ ಗೃಹ ಸಚಿವ ಅಮಿತ್ ಶಾ ಮತ್ತು ಗುಜರಾತ್ ಮುಖ್ಯಮಂತ್ರಿ ಭೂಪೇಂದ್ರ ಪಟೇಲ್ ಅವರು ‘ಸೇವಾ ಸಂಕಲ್ಪ ಅಭಿಯಾನ’ಕ್ಕೆ ಚಾಲನೆ ನೀಡಿದ್ದರು. ಇದೇ ಸಂದರ್ಭದಲ್ಲಿ ವಡನಗರ–ವಾರಾಣಸಿ ಬೈಕ್‌ ಯಾತ್ರೆಗೆ ಹಸಿರು ನಿಶಾನೆ ತೋರಿಸಲಾಗಿತ್ತು.

ವಡನಗರವು ಪ್ರಧಾನಿ ಮೋದಿಯವರ ಆರಂಭಿಕ ಜೀವನದೊಂದಿಗೆ ಗುರುತಿಸಿಕೊಂಡಿರುವ ಸ್ಥಳವಾಗಿದ್ದು, ವಾರಾಣಸಿ ಅವರ ಲೋಕಸಭಾ ಕ್ಷೇತ್ರವಾಗಿದೆ. ಈ ಎರಡು ನಗರಗಳನ್ನು ಸಂಪರ್ಕಿಸುವ ದ್ವಿಮುಖ ಬೈಕ್‌ ಯಾತ್ರೆಯು ಅಕ್ಟೋಬರ್ 7ರವರೆಗೆ ಮುಂದುವರಿಯಲಿದೆ.