ನವದೆಹಲಿ: ದೇಶದ ನೋಂದಾಯಿತ ಉತ್ಪಾದನಾ ವಲಯವು 2024-25ನೇ ಹಣಕಾಸು ವರ್ಷದಲ್ಲಿ ಗಮನಾರ್ಹ ಬೆಳವಣಿಗೆ ದಾಖಲಿಸಿದೆ. ವಾರ್ಷಿಕ ಕೈಗಾರಿಕಾ ಸಮೀಕ್ಷೆ (Annual Survey of Industries) ದತ್ತಾಂಶದ ಪ್ರಕಾರ, ಈ ಅವಧಿಯಲ್ಲಿ ಉತ್ಪಾದನಾ ವಲಯದ ಕೈಗಾರಿಕಾ ಉತ್ಪಾದನೆ ಶೇ.7.81ರಷ್ಟು ಹೆಚ್ಚಾಗಿದೆ. ಇದೇ ವೇಳೆ ವಲಯದಲ್ಲಿನ ಒಟ್ಟು ಉದ್ಯೋಗವೂ ಹಿಂದಿನ ಹಣಕಾಸು ವರ್ಷಕ್ಕೆ ಹೋಲಿಸಿದರೆ ಸುಮಾರು ಶೇ.7.2ರಷ್ಟು ಏರಿಕೆಯಾಗಿದೆ.
ಕಾರ್ಖಾನೆಗಳ ಸಂಖ್ಯೆಯಲ್ಲೂ ಹೆಚ್ಚಳ
ಕೇಂದ್ರ ಅಂಕಿಅಂಶ ಮತ್ತು ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯ ಬಿಡುಗಡೆ ಮಾಡಿರುವ ವಾರ್ಷಿಕ ಕೈಗಾರಿಕಾ ಸಮೀಕ್ಷೆಯ ಮಾಹಿತಿಯ ಪ್ರಕಾರ, ದೇಶದ ನೋಂದಾಯಿತ ಉತ್ಪಾದನಾ ವಲಯದಲ್ಲಿನ ಒಟ್ಟು ಘಟಕಗಳ ಸಂಖ್ಯೆ 2023-24ರಲ್ಲಿ 2.60 ಲಕ್ಷ ಇದ್ದರೆ, 2024-25ರಲ್ಲಿ 2.67 ಲಕ್ಷಕ್ಕೆ ಏರಿಕೆಯಾಗಿದೆ.
ಅಂದರೆ, ಒಂದು ವರ್ಷದ ಅವಧಿಯಲ್ಲಿ ಉತ್ಪಾದನಾ ಘಟಕಗಳ ಸಂಖ್ಯೆಯಲ್ಲಿ ಶೇ.2.64ರಷ್ಟು ಬೆಳವಣಿಗೆ ಕಂಡುಬಂದಿದೆ.
ತಮಿಳುನಾಡು ಮುಂಚೂಣಿಯಲ್ಲಿ
ದೇಶದಲ್ಲೇ ಅತಿ ಹೆಚ್ಚು ನೋಂದಾಯಿತ ಉತ್ಪಾದನಾ ಘಟಕಗಳು ತಮಿಳುನಾಡಿನಲ್ಲಿ ದಾಖಲಾಗಿವೆ. ನಂತರದ ಸ್ಥಾನಗಳಲ್ಲಿ ಗುಜರಾತ್ ಮತ್ತು ಮಹಾರಾಷ್ಟ್ರ ರಾಜ್ಯಗಳಿವೆ.
ಉತ್ಪಾದನಾ ವಲಯದ ವಿಸ್ತರಣೆಯಲ್ಲಿ ಈ ರಾಜ್ಯಗಳು ಪ್ರಮುಖ ಪಾತ್ರ ವಹಿಸುತ್ತಿವೆ.
ಉದ್ಯೋಗ ಸೃಷ್ಟಿಯಲ್ಲೂ ಏರಿಕೆ
ಉತ್ಪಾದನಾ ವಲಯದ ಬೆಳವಣಿಗೆಯ ಜೊತೆಗೆ ಉದ್ಯೋಗಿಗಳ ವೇತನ ಹಾಗೂ ಇತರ ಸಂಬಳ ಪಾವತಿಗಳಲ್ಲೂ ಗಮನಾರ್ಹ ಹೆಚ್ಚಳ ಕಂಡುಬಂದಿದೆ. 2024-25ರಲ್ಲಿ ಕಾರ್ಮಿಕರಿಗೆ ಪಾವತಿಸಲಾದ ಒಟ್ಟು ಸಂಬಳವು ಹಿಂದಿನ ವರ್ಷಕ್ಕೆ ಹೋಲಿಸಿದರೆ ಶೇ.12ಕ್ಕೂ ಹೆಚ್ಚು ಏರಿಕೆಯಾಗಿದೆ.
ಉದ್ಯೋಗದ ದೃಷ್ಟಿಯಿಂದ ತಮಿಳುನಾಡು, ಮಹಾರಾಷ್ಟ್ರ, ಗುಜರಾತ್, ಉತ್ತರ ಪ್ರದೇಶ ಮತ್ತು ಹರಿಯಾಣ ದೇಶದ ಅಗ್ರ ಐದು ರಾಜ್ಯಗಳಾಗಿವೆ. ಈ ಐದು ರಾಜ್ಯಗಳು ಒಟ್ಟಾಗಿ 2024-25ರಲ್ಲಿ ದೇಶದ ಒಟ್ಟು ಉತ್ಪಾದನಾ ವಲಯದ ಉದ್ಯೋಗದಲ್ಲಿ ಶೇ.56ಕ್ಕೂ ಹೆಚ್ಚು ಪಾಲು ಹೊಂದಿವೆ.
ಉತ್ಪಾದನಾ ಘಟಕಗಳ ಹೆಚ್ಚಳ, ಕೈಗಾರಿಕಾ ಉತ್ಪಾದನೆಯ ಏರಿಕೆ ಹಾಗೂ ಉದ್ಯೋಗ ಸೃಷ್ಟಿಯಲ್ಲಿನ ಪ್ರಗತಿ ದೇಶದ ನೋಂದಾಯಿತ ಉತ್ಪಾದನಾ ವಲಯವು ಮತ್ತಷ್ಟು ವಿಸ್ತರಿಸುತ್ತಿರುವುದನ್ನು ಸೂಚಿಸುತ್ತದೆ.
