ಹೈದರಾಬಾದ್: ತೆಲಂಗಾಣದ ಜೈಲು ವ್ಯವಸ್ಥೆಯಲ್ಲಿ ಇದೇ ಮೊದಲ ಬಾರಿಗೆ 78 ಕೈದಿಗಳು ರಾಷ್ಟ್ರೀಯ ಮುಕ್ತ ಶಾಲಾ ಶಿಕ್ಷಣ ಸಂಸ್ಥೆ (NIOS) ಮೂಲಕ ಎಸ್ಎಸ್ಸಿ ಪರೀಕ್ಷೆಯಲ್ಲಿ ಉತ್ತೀರ್ಣರಾಗಿದ್ದಾರೆ. ಈ ಸಾಧನೆಯನ್ನು ಪ್ರೋತ್ಸಾಹಿಸುವ ನಿಟ್ಟಿನಲ್ಲಿ ಜೈಲುಗಳ ಮಹಾನಿರ್ದೇಶಕಿ ಡಾ. ಸೌಮ್ಯ ಮಿಶ್ರಾ ಅವರು ಯಶಸ್ವಿ ಕೈದಿಗಳಿಗೆ ವಿಶೇಷ ಶಿಕ್ಷಾ ವಿನಾಯಿತಿ ಘೋಷಿಸಿದ್ದಾರೆ.
ತೆಲಂಗಾಣ ಜೈಲು ಇಲಾಖೆ ಮತ್ತು NIOS ನಡುವಿನ ಒಪ್ಪಂದದಡಿ ಚರ್ಲಪಲ್ಲಿ ಕೇಂದ್ರ ಕಾರಾಗೃಹ, ನಿಜಾಮಾಬಾದ್ ಕೇಂದ್ರ ಕಾರಾಗೃಹ ಹಾಗೂ ಹೈದರಾಬಾದ್ನ ಮಹಿಳಾ ವಿಶೇಷ ಕಾರಾಗೃಹದ ಒಟ್ಟು 108 ಕೈದಿಗಳು ಎಸ್ಎಸ್ಸಿ ಪರೀಕ್ಷೆಗೆ ನೋಂದಾಯಿಸಿಕೊಂಡಿದ್ದರು.
ಕೈದಿಗಳಿಗೆ ನಿಯಮಿತ ಶಿಕ್ಷಣ ಒದಗಿಸಲು ಸರ್ಕಾರಿ ಹಾಗೂ ಖಾಸಗಿ ಶಿಕ್ಷಕರನ್ನು ನಿಯೋಜಿಸಲಾಗಿತ್ತು. ಶಿಕ್ಷಕರ ವೇತನವನ್ನು ಜೈಲು ಇಲಾಖೆಯೇ ಭರಿಸಿತ್ತು. ಒಂದು ವರ್ಷ ನಿರಂತರ ತರಗತಿಗಳು ಹಾಗೂ ಮಾದರಿ ಪರೀಕ್ಷೆಗಳಲ್ಲಿ ಭಾಗವಹಿಸಿದ ಬಳಿಕ 78 ಕೈದಿಗಳು ಎಸ್ಎಸ್ಸಿ ಪರೀಕ್ಷೆಯಲ್ಲಿ ಯಶಸ್ವಿಯಾಗಿದ್ದಾರೆ. ಇವರಲ್ಲಿ ಚರ್ಲಪಲ್ಲಿ ಕಾರಾಗೃಹದ 56, ನಿಜಾಮಾಬಾದ್ನ 15 ಹಾಗೂ ಮಹಿಳಾ ಕಾರಾಗೃಹದ 7 ಕೈದಿಗಳು ಸೇರಿದ್ದಾರೆ.
ಡಾ. ಸೌಮ್ಯ ಮಿಶ್ರಾ ಅವರು ಯಶಸ್ವಿ ಕೈದಿಗಳಿಗೆ ಪ್ರಮಾಣಪತ್ರಗಳನ್ನು ವಿತರಿಸಿ, ಅವರ ಪರಿಶ್ರಮ, ಶಿಸ್ತು ಮತ್ತು ಕಲಿಕೆಯ ಬದ್ಧತೆಯನ್ನು ಶ್ಲಾಘಿಸಿದರು. ಈ ಸಂದರ್ಭದಲ್ಲಿ ಹಲವು ಕೈದಿಗಳು ಶಿಕ್ಷಣದ ಕೊರತೆಯಿಂದ ತಮ್ಮ ಜೀವನದಲ್ಲಿ ಎದುರಿಸಿದ ಸಮಸ್ಯೆಗಳನ್ನು ಹಂಚಿಕೊಂಡರು.
ಯಶಸ್ವಿಯಾದ ಕೈದಿಗಳಲ್ಲಿ ಒಬ್ಬರು ಭವಿಷ್ಯದಲ್ಲಿ ವಕೀಲರಾಗಿ, ಬಡ ಕೈದಿಗಳಿಗೆ ಉಚಿತ ಕಾನೂನು ನೆರವು ನೀಡುವ ಆಶಯ ವ್ಯಕ್ತಪಡಿಸಿದ್ದಾರೆ.
ಈ ಯಶಸ್ಸಿನಿಂದ ಉತ್ತೇಜಿತವಾಗಿರುವ ಜೈಲು ಇಲಾಖೆ, ಎಸ್ಎಸ್ಸಿ ಉತ್ತೀರ್ಣರಾದ ಕೈದಿಗಳಿಗೆ ಮುಂದಿನ ಹಂತದಲ್ಲಿ ಪಿಯುಸಿ ಸಮಾನವಾದ ಹಿರಿಯ ಪ್ರೌಢ ಶಿಕ್ಷಣ ಪಡೆಯಲು ಹಾಗೂ ಬಳಿಕ ಪದವಿ ಶಿಕ್ಷಣ ಮುಂದುವರಿಸಲು ಅಗತ್ಯ ನೆರವು ನೀಡಲಿದೆ.
ಇದೇ ವೇಳೆ ಮತ್ತಷ್ಟು 47 ಕೈದಿಗಳು ಎಸ್ಎಸ್ಸಿ ಶಿಕ್ಷಣಕ್ಕೆ ಹೊಸದಾಗಿ ನೋಂದಾಯಿಸಿಕೊಂಡಿದ್ದಾರೆ. ಎಸ್ಎಸ್ಸಿ ಉತ್ತೀರ್ಣರಾದ ಕೈದಿಗಳಿಗೆ ಚರ್ಲಪಲ್ಲಿ ಕಾರಾಗೃಹದಲ್ಲಿರುವ ಕೈಗಾರಿಕಾ ತರಬೇತಿ ಸಂಸ್ಥೆ (ITI) ಮೂಲಕ ತಾಂತ್ರಿಕ ಕೋರ್ಸ್ಗಳನ್ನು ಕಲಿಯುವ ಅವಕಾಶವೂ ದೊರೆಯಲಿದೆ. ಶಿಕ್ಷಣದ ಜೊತೆಗೆ ಕೌಶಲ್ಯಾಭಿವೃದ್ಧಿಗೆ ಒತ್ತು ನೀಡುವ ಮೂಲಕ ಕೈದಿಗಳಿಗೆ ಉತ್ತಮ ಭವಿಷ್ಯ ರೂಪಿಸಿಕೊಳ್ಳಲು ನೆರವಾಗುವುದು ಇಲಾಖೆಯ ಉದ್ದೇಶವಾಗಿದೆ.
