ಕೊಚ್ಚಿ: ಭಾರತೀಯ ನೌಕಾಪಡೆ ಮತ್ತು ಅಮೆರಿಕ ನೌಕಾಪಡೆಗಳ ನಡುವಿನ ವಿಶೇಷ ಸ್ಫೋಟಕ ವಸ್ತು ನಿಷ್ಕ್ರಿಯಗೊಳಿಸುವ ತರಬೇತಿ (Explosive Ordnance Disposal – EOD) ಅಭ್ಯಾಸಕ್ಕೆ ಕೊಚ್ಚಿಯ ದಕ್ಷಿಣ ನೌಕಾ ಕಮಾಂಡ್ನಲ್ಲಿ ಇಂದು ಚಾಲನೆ ದೊರೆಯಲಿದೆ. ಈ ಜಂಟಿ ಅಭ್ಯಾಸ ಆಗಸ್ಟ್ 14ರವರೆಗೆ ನಡೆಯಲಿದೆ.
ರಕ್ಷಣಾ ಸಚಿವಾಲಯದ ಪ್ರಕಾರ, ಎರಡೂ ದೇಶಗಳ ನೌಕಾಪಡೆಗಳ ವಿಶೇಷ ಡೈವಿಂಗ್ ಹಾಗೂ EOD ತಂಡಗಳ ನಡುವಿನ ಕಾರ್ಯಾಚರಣಾ ಹೊಂದಾಣಿಕೆಯನ್ನು (Interoperability) ಹೆಚ್ಚಿಸುವುದು ಮತ್ತು ವೃತ್ತಿಪರ ಸಹಕಾರವನ್ನು ಮತ್ತಷ್ಟು ಬಲಪಡಿಸುವುದು ಈ ಐದು ದಿನಗಳ ಅಭ್ಯಾಸದ ಪ್ರಮುಖ ಉದ್ದೇಶವಾಗಿದೆ.
ಅಭ್ಯಾಸದ ವೇಳೆ ತಜ್ಞರ ನಡುವೆ ವಿಚಾರ ವಿನಿಮಯ, ಪರಸ್ಪರ ತರಬೇತಿ, ವಿವಿಧ ಉಪಕರಣಗಳ ಪ್ರದರ್ಶನ ಹಾಗೂ ನೈಜ ಪರಿಸ್ಥಿತಿಯನ್ನು ಆಧರಿಸಿದ ಪ್ರಾಯೋಗಿಕ ತರಬೇತಿ ಸೇರಿದಂತೆ ಹಲವು ಚಟುವಟಿಕೆಗಳು ನಡೆಯಲಿವೆ.
ಭಾರತೀಯ ನೌಕಾಪಡೆ ಮತ್ತು ಅಮೆರಿಕ ನೌಕಾಪಡೆಗಳು 2005ರಿಂದ ಜಂಟಿಯಾಗಿ ಸಾಲ್ವೇಜ್ ಮತ್ತು EOD ಅಭ್ಯಾಸಗಳನ್ನು ನಡೆಸುತ್ತಿವೆ. ಈ ಬಾರಿಯ ತರಬೇತಿ ಎರಡೂ ನೌಕಾಪಡೆಗಳ ನಡುವಿನ ವಿಶೇಷ ದ್ವಿಪಕ್ಷೀಯ ತರಬೇತಿ ಸರಣಿಯ ಎಂಟನೇ ಆವೃತ್ತಿಯಾಗಿದೆ ಎಂದು ರಕ್ಷಣಾ ಸಚಿವಾಲಯ ತಿಳಿಸಿದೆ.
ಈ ಅಭ್ಯಾಸದ ಮೂಲಕ ಸ್ಫೋಟಕ ಅಪಾಯಗಳನ್ನು ಎದುರಿಸುವುದು, ನೀರಿನೊಳಗಿನ ಕಾರ್ಯಾಚರಣೆ ಹಾಗೂ ತುರ್ತು ಪರಿಸ್ಥಿತಿಗಳಲ್ಲಿ ಎರಡೂ ನೌಕಾಪಡೆಗಳ ತಜ್ಞ ತಂಡಗಳ ನಡುವಿನ ಸಮನ್ವಯವನ್ನು ಮತ್ತಷ್ಟು ಪರಿಣಾಮಕಾರಿಯಾಗಿಸುವ ನಿರೀಕ್ಷೆಯಿದೆ.
