ಸ್ವಿಟ್ಜರ್ಲ್ಯಾಂಡ್ನ ಕ್ರಾನ್ಸ್–ಮಾಂಟಾನಾ ಸ್ಕೀ ರಿಸಾರ್ಟ್ನಲ್ಲಿ ಹೊಸ ವರ್ಷದ ಸಂಭ್ರಮಾಚರಣೆಯ ಮಧ್ಯೆ ಸಂಭವಿಸಿದ ಭೀಕರ ಸ್ಫೋಟ ಮತ್ತು ಅಗ್ನಿ ಅವಘಡದಲ್ಲಿ ಸುಮಾರು 40 ಮಂದಿ ಸಾವನ್ನಪ್ಪಿ, 115ಕ್ಕೂ ಹೆಚ್ಚು ಮಂದಿ ಗಾಯಗೊಂಡಿರುವ ಘಟನೆ ಜಗತ್ತಿನಾದ್ಯಂತ ತೀವ್ರ ಶೋಕ ಹುಟ್ಟಿಸಿದೆ.
ವಾಲೈಸ್ ಕ್ಯಾಂಟನ್ ಪ್ರದೇಶದಲ್ಲಿರುವ ಜನಪ್ರಿಯ ‘ಲೆ ಕಾಂಸ್ಟೆಲೇಶನ್’ ಬಾರ್ನಲ್ಲಿ ಹೊಸ ವರ್ಷ ಸ್ವಾಗತಿಸಲು ನೂರಾರು ಮಂದಿ ಸೇರಿದ್ದ ಸಮಯದಲ್ಲಿ ಈ ದುರಂತ ಸಂಭವಿಸಿದೆ. ಸ್ಫೋಟದ ನಂತರ ಕೆಲವೇ ಕ್ಷಣದಲ್ಲಿ ಭಾರೀ ಬೆಂಕಿ ಬಾರ್ ಮತ್ತು ಸುತ್ತಲಿನ ಪ್ರದೇಶವನ್ನು ಆವರಿಸಿಕೊಂಡಿದ್ದು, ಜನರು ಓಡಿಹೋಗಲು ಸಹ ಅವಕಾಶವಿಲ್ಲದ ಸ್ಥಿತಿ ನಿರ್ಮಾಣವಾಯಿತು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ತೀವ್ರವಾಗಿ ಗಾಯಗೊಂಡವರನ್ನು ಸಿಯೋನ್ ಹಾಗೂ ಇತರ ನಗರಗಳ ಆಸ್ಪತ್ರೆಗೆ ತುರ್ತುವಾಗಿ ಸ್ಥಳಾಂತರಿಸಲಾಗಿದ್ದು, ರಕ್ಷಣಾ ತಂಡಗಳು, ಅಗ್ನಿಶಾಮಕ ಸಿಬ್ಬಂದಿ, ಹೆಲಿಕಾಪ್ಟರ್ಗಳು ಮತ್ತು ಅಂಬುಲೆನ್ಸ್ಗಳು ತಕ್ಷಣ ಸ್ಥಳಕ್ಕೆ ಧಾವಿಸಿವೆ. ಪರಿಸ್ಥಿತಿಯ ಗಂಭೀರತೆಯನ್ನು ಮನಗಂಡ ವಾಲೈಸ್ ಕ್ಯಾಂಟನ್ ಸರ್ಕಾರ ‘ವಿಶೇಷ ಸ್ಥಿತಿ’ (Special Situation) ಘೋಷಿಸಿ ತುರ್ತು ಸಂಪನ್ಮೂಲಗಳನ್ನು ಬಳಕೆ ಮಾಡಿದೆ.
ವಾಲೈಸ್ ಕ್ಯಾಂಟನ್ ಪೊಲೀಸ್ ಕಮಾಂಡರ್ ಫ್ರೆಡೆರಿಕ್ ಗಿಸ್ಲರ್ ತಿಳಿಸಿದ್ದಾರೆ, ಸಾವನ್ನಪ್ಪಿದವರ ಗುರುತಿನ ಪರಿಶೀಲನೆ ಹಾಗೂ ಕುಟುಂಬಗಳಿಗೆ ಮಾಹಿತಿ ನೀಡುವ ಕಾರ್ಯ ನಡೆಯುತ್ತಿದೆ. ಅಧಿಕಾರಿಗಳು ಸ್ಫೋಟದ ನಿಖರ ಕಾರಣವನ್ನು ತನಿಖೆ ಮಾಡುತ್ತಿದ್ದು, ದುಷ್ಕೃತ್ಯ ಅಥವಾ ದಾಳಿ ಎನ್ನುವ ವದಂತಿಯನ್ನು ಸಂಪೂರ್ಣವಾಗಿ ತಳ್ಳಿಹಾಕಿದ್ದಾರೆ.
ಈ ದುರಂತದ ಹಿನ್ನೆಲೆಯಲ್ಲಿ ಸ್ವಿಸ್ ಅಧ್ಯಕ್ಷ ಗೈ ಪರ್ಮೆಲಿನ್ ತಮ್ಮ ಹೊಸ ವರ್ಷದ ಭಾಷಣವನ್ನು ಮುಂದೂಡಿದ್ದು, ಮೃತರ ಕುಟುಂಬಗಳಿಗೆ ಆಳವಾದ ಸಾಂತ್ವನ ಸೂಚಿಸಿದ್ದಾರೆ.
ಹೊಸ ವರ್ಷದ ಸಂಭ್ರಮಾಚರಣೆ ದುರಂತವಾಗಿ ಮಾರ್ಪಟ್ಟಿರುವ ಈ ಘಟನೆ ಯೂರೋಪಿನಲ್ಲಿ ಇತ್ತೀಚಿನ ವರ್ಷಗಳಲ್ಲಿ ಸಂಭವಿಸಿದ ಅತ್ಯಂತ ಭೀಕರ ಅವಘಡಗಳಲ್ಲಿ ಒಂದಾಗಿದೆ.
