ಬೆಂಗಳೂರು ನಗರದ ನ್ಯಾಷನಲ್ ಕಾಲೇಜು ಮೈದಾನದಲ್ಲಿ ನಡೆಯುತ್ತಿರುವ ಪ್ರಸಿದ್ಧ ಅವರೇಬೇಳೆ ಮೇಳ–2025ಕ್ಕೆ ಇಂದು ಭವ್ಯ ಉದ್ಘಾಟನೆ ನಡೆಯಿತು. ಕನ್ನಡ ಚಿತ್ರರಂಗದ ಖ್ಯಾತ ನಟಿ ತಾರಾ ಅವರು ಉದ್ಘಾಟನಾ ಸಮಾರಂಭದಲ್ಲಿ ಭಾಗವಹಿಸಿ ಮೇಳಕ್ಕೆ ಅಧಿಕೃತ ಚಾಲನೆ ನೀಡಿದರು.
ಸಾಂಪ್ರದಾಯಿಕ ಪೂಜಾ ವಿಧಿವಿಧಾನಗಳೊಂದಿಗೆ ಆರಂಭವಾದ ಕಾರ್ಯಕ್ರಮದಲ್ಲಿ ತಾರಾ ಅವರು ಮಾತನಾಡಿ, “ನಾಡಿನ ಆಹಾರ ಸಂಸ್ಕೃತಿ ಮತ್ತು ರೈತರ ಪರಿಶ್ರಮವನ್ನು ಪ್ರತಿಬಿಂಬಿಸುವ ಅವರೇಬೇಳೆ ಮೇಳವು ನಮ್ಮ ಸಂಸ್ಕೃತಿಯ ಹೆಮ್ಮೆ. ಇಂತಹ ಮೇಳಗಳು ಮುಂದಿನ ಪೀಳಿಗೆಗೆ ಪರಂಪರೆಯ ಮೌಲ್ಯವನ್ನು ಪರಿಚಯಿಸುತ್ತವೆ” ಎಂದು ಹೇಳಿದರು.
ಮೇಳದಲ್ಲಿ ವಿವಿಧ ರೀತಿಯ ಅವರೇಬೇಳೆ ಪದಾರ್ಥಗಳು, ಗ್ರಾಮೀಣ ಸೊಗಡಿನ ಆಹಾರ ಮಳಿಗೆಗಳು, ಕೈತೋಟ ಉತ್ಪನ್ನಗಳು ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮಗಳು ಜನರ ಗಮನ ಸೆಳೆಯುತ್ತಿವೆ. ಉದ್ಘಾಟನಾ ದಿನವೇ ಸಾವಿರಾರು ಮಂದಿ ಮೇಳಕ್ಕೆ ಭೇಟಿ ನೀಡಿ ಉತ್ಸವದ ಸಂಭ್ರಮದಲ್ಲಿ ಭಾಗಿಯಾದರು.
ಡಿ.27ರಿಂದ ಜನವರಿ 4ರವರೆಗೆ ನಡೆಯಲಿರುವ ಈ ಮೇಳವು ನಗರ ಮತ್ತು ಪ್ರವಾಸಿಗರಿಗೂ ವಿಶೇಷ ಆಕರ್ಷಣೆಯಾಗಿದ್ದು, ಪ್ರತಿದಿನವೂ ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ಆಯೋಜಿಸಲಾಗಿದೆ.
