ಪ್ರಮುಖ ಉದ್ಯಮಿ ಮತ್ತು ಕಾಂಗ್ರೆಸ್ ನಾಯಕಿ ಪ್ರಿಯಾಂಕಾಗಾಂಧಿ ಅವರ ಪತಿ ರಾಬರ್ಟ್ ವಾದ್ರಾ ವಿರುದ್ಧ ಜಾರಿ ನಿರ್ದೇಶನಾಲಯ (ED) ಮತ್ತೊಂದು ಹಣಕಾಸು ಅಕ್ರಮ ಪ್ರಕರಣದಲ್ಲಿ ಚಾರ್ಜ್ಶೀಟ್ ದಾಖಲಿಸಿದೆ. ಯುಕೆಯಲ್ಲಿ ನೆಲೆಸಿರುವ ಶಸ್ತ್ರಾಸ್ತ್ರ ಸಲಹೆಗಾರ ಸಂಜಯ್ ಭಂಡಾರಿ ಸಂಬಂಧಿತ ಹಣ ಅಕ್ರಮ ವಹಿವಾಟು ಪ್ರಕರಣದಲ್ಲಿ ಈ ಚಾರ್ಜ್ಶೀಟ್ ಸಲ್ಲಿಸಲಾಗಿದೆ ಎಂದು ಅಧಿಕೃತ ಮೂಲಗಳು ತಿಳಿಸಿವೆ.
ಈ ಸಂಬಂಧ ವಿಚಾರಣೆ ಮುಂದುವರಿಯುತ್ತಿರುವ ಹಿನ್ನೆಲೆ, ಹಣಕಾಸು ಅಕ್ರಮಗಳ ನಿಯಂತ್ರಣ ಕಾಯ್ದೆ (PMLA) ಅಡಿಯಲ್ಲಿ ವಿಶೇಷ ನ್ಯಾಯಾಲಯಕ್ಕೆ ಪ್ರಾಸಿಕ್ಯೂಷನ್ ಕಂಪ್ಲೇಂಟ್ ಸಲ್ಲಿಸಲಾಗಿದೆ. ವಾದ್ರಾ ವಿರುದ್ಧ ED ದಾಖಲಿಸಿರುವ ಇದು ಎರಡನೇ ಚಾರ್ಜ್ಶೀಟ್ ಆಗಿದೆ.
ಈ ಮೊದಲು ಜುಲೈ ತಿಂಗಳಲ್ಲಿ ಹರಿಯಾಣದ ಶಿವಖೋಪುರ ಭೂ ಒಪ್ಪಂದದಲ್ಲಿ ನಡೆದ ಅನಿಯಮಿತತೆಗಳ ಬಗ್ಗೆ ED ತನಿಖೆ ನಡೆಸಿ, ಹಣ ಅಕ್ರಮ ವಹಿವಾಟಿನ ಆರೋಪದ ಮೇಲೆ ವಾದ್ರಾ ವಿರುದ್ಧ ಮೊದಲ ಚಾರ್ಜ್ಶೀಟ್ ಸಲ್ಲಿಸಿತ್ತು.
ರಾಬರ್ಟ್ ವಾದ್ರಾ ಅವರು ಸಂಜಯ್ ಭಂಡಾರಿ ಸಂಬಂಧಿತ ಪ್ರಕರಣದಲ್ಲಿ ED ಮುಂದೆ ಹಿಂದೆ ಹಲವಾರು ಬಾರಿ ವಿಚಾರಣೆಗೆ ಹಾಜರಾಗಿದ್ದರು.
ಸಂಜಯ್ ಭಂಡಾರಿ ವಿರುದ್ಧ ಭಾರತ ಸರ್ಕಾರ ನಡಿಸಿದ್ದ ಎಕ್ಸ್ಟ್ರಡಿಷನ್ ಮನವಿಯನ್ನು ಬ್ರಿಟನ್ ನ್ಯಾಯಾಲಯ ತಿರಸ್ಕರಿಸಿದ್ದನ್ನು ಅಧಿಕಾರಿಗಳು ನೆನಪಿಸಿದ್ದಾರೆ. ಇದೇ ವರ್ಷದ ಜುಲೈ ತಿಂಗಳಲ್ಲಿ ದೆಹಲಿ ನ್ಯಾಯಾಲಯವು ಅವರನ್ನು ಫ್ಯುಜಿಟಿವ್ ಎಕನಾಮಿಕ್ ಆಫೆಂಡರ್ ಎಂದು ಘೋಷಿಸಿತ್ತು.
ED ಮೂಲಗಳ ಪ್ರಕಾರ, ಭಂಡಾರಿ ಮತ್ತು ಇತರರ ವಿರುದ್ಧದ PMLA ಪ್ರಕರಣವನ್ನು IT ಇಲಾಖೆಯ ಆರೋಪಪಟ್ಟಿ ಆಧಾರವಾಗಿಸಿಕೊಂಡು 2017ರ ಫೆಬ್ರವರಿಯಲ್ಲಿ ED ಕ್ರಿಮಿನಲ್ ಪ್ರಕರಣ ದಾಖಲಿಸಿತ್ತು.
