ವಾಷಿಂಗ್ಟನ್, ನ.15:
ಗಾಜಾದ ಭವಿಷ್ಯಕ್ಕೆ ಸಂಬಂಧಿಸಿದಂತೆ ಅಮೇರಿಕಾ ಸೇನೆ ರೂಪಿಸುತ್ತಿರುವ ಹೊಸ ಯೋಜನೆಗಳು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಗಂಭೀರ ಪ್ರಶ್ನೆಗಳನ್ನು ಎಬ್ಬಿಸಿವೆ. ಅಮೇರಿಕಾ ಪ್ರಸ್ತಾಪಿಸಿರುವಂತೆ, ಗಾಜಾವನ್ನು ಹಸಿರು ವಲಯ (Green Zone) ಗಳಾಗಿ ವಿಭಜಿಸಿ, ಅಲ್ಲಿ ಅಂತರರಾಷ್ಟ್ರೀಯ ಮತ್ತು ಇಸ್ರೇಲಿ ಸೈನಿಕರ ನಿಯಂತ್ರಣ ಇರಿಸುವ ಪ್ರಸ್ತಾಪ ಮುಂದಿರಿಸಲಾಗಿದೆ.
ಈ ಯೋಜನೆಗಳು, ಕಳೆದ ತಿಂಗಳು ಘೋಷಿಸಲಾದ ತಾತ್ಕಾಲಿಕ ಯುದ್ಧ ವಿರಾಮವನ್ನು ದೀರ್ಘಕಾಲೀನ ರಾಜಕೀಯ ಒಪ್ಪಂದವಾಗಿ ಪರಿವರ್ತಿಸಲು ಅಮೇರಿಕಾ ಎಷ್ಟು ಬದ್ಧವಾಗಿದೆ? ಎನ್ನುವ ಪ್ರಶ್ನೆಯನ್ನು ಹುಟ್ಟಿಸುತ್ತಿವೆ. ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಗಾಜಾದ ಮೇಲೆ ಪಾಲಸ್ತೀನಿಯ ಆಡಳಿತವನ್ನು ಪುನಃಸ್ಥಾಪನೆ ಮಾಡುವ ಭರವಸೆ ನೀಡಿದ್ದರೂ, ಅಮೇರಿಕಾದ ಹೊಸ ಸೈನಿಕ ಯೋಜನೆಗಳು ಅದಕ್ಕೆ ವಿರುದ್ಧವಾಗಿ ಕಾಣಿಸುತ್ತಿವೆ.
ಗಾಜಾದ ಭವಿಷ್ಯಕ್ಕೆ ಸಂಬಂಧಿಸಿದ ಅಮೇರಿಕಾದ ಯೋಜನೆಗಳು ಕಳೆದ ಕೆಲವು ವಾರಗಳಲ್ಲಿ ನಿರಂತರವಾಗಿ ಬದಲಾಗುತ್ತಿವೆ. ಸುಮಾರು 20 ಲಕ್ಷ ಪಾಲಸ್ತೀನಿಯರಿಗೆ ಆಹಾರ, ಆಶ್ರಯ ಮತ್ತು ಮಾನವೀಯ ನೆರವು ಒದಗಿಸುವ ಜವಾಬ್ದಾರಿಯ ನಡುವೆ, ಗಾಜಾದ ನಿರ್ವಹಣೆ ಕುರಿತು ವಾಷಿಂಗ್ಟನ್ ಸ್ಪಷ್ಟವಾದ ಯೋಜನೆಯನ್ನು ನೀಡದೇ ಇರೋದು ಟೀಕೆಗೆ ಗುರಿಯಾಗಿದೆ.
ಮೊದಲು, ಅಮೇರಿಕಾ “Alternative Safe Communities (ASC)” ಎಂಬ ಹೆಸರಿನಲ್ಲಿ ಬೇಲಿ ಹಾಕಿದ ಶಿಬಿರಗಳಲ್ಲಿ ಚಿಕ್ಕ ಗುಂಪುಗಳಾಗಿ ಪಾಲಸ್ತೀನಿಯರನ್ನು ವಸತಿಗೊಳಿಸುವ ಯೋಜನೆ ಮುಂದಿರಿಸಿತ್ತು. ಆದರೆ ಮಾನವ ಹಕ್ಕು ಸಂಸ್ಥೆಗಳ ತೀವ್ರ ವಿರೋಧದ ಹಿನ್ನೆಲೆಯಲ್ಲಿ, ಈ ಯೋಜನೆಯನ್ನು ಈ ವಾರ ಸಂಪೂರ್ಣವಾಗಿ ಕೈಬಿಡಲಾಗಿದೆ ಎಂದು ಅಮೇರಿಕಾ ಅಧಿಕಾರಿಗಳು ತಿಳಿಸಿದ್ದಾರೆ.
ಆದಾಗ್ಯೂ, ಮಾನವೀಯ ಸಂಸ್ಥೆಗಳು ಈ ಬದಲಾವಣೆ ಬಗ್ಗೆ ಅಧಿಕೃತ ಮಾಹಿತಿ ಪಡೆದಿಲ್ಲ ಎಂದು ತಿಳಿಸಿವೆ.
ಇಸ್ರೇಲ್ ಸೇನೆ ಹೊರಹೋಗುವ ಗುರಿ, ಅಂತರರಾಷ್ಟ್ರೀಯ ಶಾಂತಿಪಡೆ ರಚನೆ ಮತ್ತು ಗಾಜಾದ ಮರುನಿರ್ಮಾಣಕ್ಕೆ ಸ್ಪಷ್ಟ ಮಾರ್ಗನಕ್ಷೆ ಇಲ್ಲದಿದ್ದರೆ, ಕಳೆದ ಎರಡು ವರ್ಷದ ನಾಶದಿಂದ ಮರುಕಳಿಸುತ್ತಿರುವ ಗಾಜಾ ಮತ್ತೆ ಅಸ್ಥಿರತೆಯ ಅಂಧಕಾರಕ್ಕೆ ತಳ್ಳಲ್ಪಡುವ ಅಪಾಯ ಇದೆ ಎಂದು ತಜ್ಞರು ಎಚ್ಚರಿಸಿದ್ದಾರೆ.
